Ötən gün cənab Prezident İlham Əliyev Bərdə Peşə Liseyinin açılışında iştirak edib. Ölkə başçısı Bərdə və ətraf regionlarda peşə təhsilin müasirləşdirilməsi istiqamətində yenidənqurulan Bərdə Peşə Liseyi ilə yaxından tanış olub. Səfər çərçivəsində cənab İlham Əliyevə məlumata verilib ki, peşə liseyində aparılan yenidənqurma işləri nəticəsində beynəlxalq standartlara cavab verən maddi texniki baza ilə təchiz olunmuş 4 mərtəbəli tədris binası, 2 ədəd hər biri 192 yerlik yataqxana, 3 mərtəbəli Emalatxana və laborotoriya korpusu, texnikaların saxlanması üçün 3 korpusdan ibarət qaraj və digər köməkçi binaların tikintisi həyata keçirilib.
2021/2022-ci tədris ilindən başlayaraq ilk dəfə olaraq yüksək texniki peşə təhsil səviyyəsi üzrə tədris aparan 6 peşə təhsil müəssisəsindən biri də Bərdə Peşə Liseyidir. Ümumilikdə, 4 regionda həyata keçirilən sözügedən təhsil səviyyəsinə qəbul Bərdə Peşə Liseyində “Nəqliyyat vasitələrinin texniki istismarı (avtomobil üzrə)”, “Binaların tikintisi və istismarı”, “Sənayedə avadanlıqlarının quraşdırılması və texniki istismarı”, “Sənaye və mülki binalarda elektrik avadanlıqlarının quraşdırılması və istismarı”, “Baytarlıq və heyvandarlıq işi”, həmçinin “Mühasibat uçotu” ixtisasları üzrə aparılıb. Yeni tədris ilindən başlayaraq tədris yenilənmiş kurikulumlar əsasında həyata keçirilir. Tələbələrin liseydə ödənişsiz əsaslarla təhsil alaraq dövlət təqaüdü almaq imkanları vardır.
Heyvandarlıq, Bitkiçilik, Aqroservis, Avtomobil təmiri istiqaməti üzrə ixtisaslaşan Bərdə Peşə Liseyində cari tədris ilində elan olunan 600 yer üzrə 533 nəfər tələbənin qəbulu həyata keçirilib. Həmçinin 2021/2022-ci tədris ilində 1150 yerlik liseydə “Avtomobil təmiri çilingəri”, “Geniş-profilli traktorçu maşinist”, “Heyvandarlıq mütəxəssisisi”, “Bitkiçilik mütəxəssisi”, “Arqoservis mütəxəssisi”, “Kompüter operatoru” ixtisaslarının tədrisi aparılmaqdadır.
Qeyd edək ki, ölkəmizdə peşə təhsilinin inkişaf etdirilməsi prioritet istiqamət kimi müəyyən olunub. Bu sahədə peşəkar tədris prosesinin qurulması, əmək bazarının, o cümlədən işəgötürənlərin tələbatlarına uyğun ixtisaslar üzrə kadr hazırlığının təmin olunması qarşıda duran əsas vəzifələrdən biridir. Son dövrlər paytaxt Bakı ilə yanaşı, bölgələrdə də yeni peşə təhsili müəssisələri qurulur. Yeni istifadəyə verilən Bərdə Peşə Liseyi də bu istiqamətdə həyata keçirilən layihələrdən biridir.
