3 noyabr 2020-ci il tarixində “World Skills International” (WSI) təşkilatının növbədənkənar ümumi yığıncağı keçirilib. Onlayn formatda təşkil edilən görüşün əsas məqsədi COVİD-19 pandemiyası ilə əlaqədar tətbiq edilən müvafiq məhdudiyyətlərin növbəti illərdə həyata keçirilməsi nəzərdə tutulan yarışlara təsirinin müzakirəsindən və müvafiq qərarların qəbulundan ibarət olub. Hazırki dövrdə 46-cı “WorldSkills” peşə ustalığı üzrə beynəlxalq yarışların 2022-ci ilədək təxirə salınması qərara alınıb. Çin 2022-ci ildə 60 bacarıq istiqaməti üzrə 1400-dən çox müsabiqəçini Şanxay şəhərində qonaq etməyi planlaşdırır. Qeyd edək ki, ilkin olaraq sözügedən yarışların 2021-ci ildə Çinin Şanxay şəhərində baş tutacağı nəzərdə tutulurdu.

        Yığıncaqda çıxış edən WSI təşkilatının İcraçı direktoru Devid Hoey peşə bacarıqları və gənclərin qlobal iqtisadi dirçəliş, tərəqqiyə yol açdığına hər zamankından daha çox inandığını, o cümlədən, üzvlər və qlobal tərəfdaşlarla bərabər növbəti 12 ayı  gənclər üçün innovativ proqramlar həyata keçirilməsinə istiqamətlənəcəyini vurğulayıb.

        Qeyd edək ki, WSI dünyada peşə bacarıqlarını təbliğ edən və iki ildən bir peşələrin Olimpiya yarışlarını keçirən beynəlxalq təşkilatdır. Cari ilin 13 oktyabr tarixində keçirilən illik Ümumi Yığıncaqda Azərbaycan WSI təşkilatına 85-ci  üzv kimi qəbul olunmuşdur.